Kampen er avlyst

Postet av Førde IL - Handball den 15. Feb 2024

Det blir ikkje kamp mot Tertnes laurdag 17.2. Tertnes har sjuke spelarar og har bede handballforbundet om å få utsett kampen. No blir det opp til handballforbundet om dei vil sette opp kampen seinare eller gi Førde to poeng.

Etter ein god siger over BSI sist søndag, er eit anna Bergenslag motstandar i Førdehuset laurdag 17. februar klokka 16. Vi slo Tertnes 32-19 i Bergen, vi er på tredjeplass med 20 poeng, medan Tertnes er heilt sist med seks poeng, så det kan i utgangspunktet sjå ut som lett match for strekspelar Alexandra Afloarei (biletet) og resten av laget vårt. Alex er veteranen i laget og har gjort ein kjempejobb denne sesongen med godt forsvarsarbeid og med viktige mål frå strekposisjon. Men ho og resten av laget veit at to poeng ikkje kan innkasserast basert på tidlegare oppgjer. Jobben må gjerast i løpet av 60 minutt komande laurdag.

Og trenar Øyvind Indrebø er klar på at dei ikkje undervurderer Tertnes.

- For eit år sidan møtte vi Tertnes borte i ein nedrykkskamp, og spelte uavgjort. Det var eit kjærkome poeng den gongen. Situasjonen er litt endra i år. Vi kjempar no om ei plassering i øvre halvdel av tabellen. Dette til tross for skadar/sjukdom hjå sentrale spelarar.

- Vi møter eit Tertnes som kjem frå ein kamp mot serieleiar Gneist onsdag, der dei hadde føringa i store delar av kampen. Gjennom dette utfordra dei serieleiaren. Rapportane frå Bergen er at Tertnes var både gode og lure. Så jentene er førebudde på ein «travel» kamp. Men vi kjenner på at vi har ferdigheitene til å kunne slå Tertnes. Så gjenstår det å utøve det i praksis. Sjåast på kamp!