No satsar vi på heimepoeng!

Laurdag 7. oktober klokka 14 håpar vi at mange tek turen til Førdehuset. Då skal Estelle Ahlquist Lundh (biletet) og resten av damene våre spele mot Glassverket 2. 

Etter eitt tap på heimebane slo damene til med to klare sigarar borte mot Reistad og Follo, og no håpar dei å vise heimepublikum at dei kan vinne også i Førdehuset.

Estelle, som er 26 år gamal, har blitt ein verdfull tilvekst i laget. Ho er svensk, men spelte på eit lag på Malta forrige sesong. Ho er ein spelar med erfaring og som tek ansvar. Mellom anna er ho ein sikker straffeskyttar. Sist sesong tapte vi poeng på at for mange straffekast vart brende.

Trenar Øyvind Indrebø har dette å seie om kampen mot Glassverket 2:

- Sidan serieopninga heime mot Hokksund har vi vore på Austlandet og spelt to kampar, som begge enda med siger. Men dette er historie. Årets lag består av jenter som har vore i klubben i mange år, saman med nye spelarar inn i klubben. Og naturleg nok er det ein prosess å få til optimal samhandling. Der føler vi at vi er på god veg, og sjølvsagt i stadig utvikling. 

No er vi klare for ny heimekamp - mot Glassverket 2. Dei har rett nok ikkje vunne kampar, men ein skal ikkje la seg lure av det, etter som dei så langt har møtt lag som truleg vil vere heilt i toppen av tabellen.

Vi har vore gjennom to gode treningsveker etter turen på Austlandet, og vi gler oss til å på nytt å slåst om poeng i Førdehuset. Men vi er førebudd på at dette blir ei tøff og spennande utfordring. Vi stiller med sju spelarar på bana, men jentene og støtteapparatet håpar på at vi har den «åttande spelaren» gjennom god støtte frå dykk på tribuna.