Oppløftande, trass tap mot Åsane

Emma Gloppestad vart kåra til vår beste og fekk premie frå Enivest, overrekt av styremedlem Ingvill Hafstad i Førde Handball.

Førde-Åsane 24-30 (13-17): Når motstandaren er  på andreplass på tabellen og har sjanse til å rykke opp i 1. divisjon, skulle ein tru at det var stor skilnad på laga i Førdehuset laurdag ettermiddag. Det var det ikkje, om vi ser bort frå nokre korte, avgjerande periodar. Førde var heilt på høgde med Åsane i første delen av første omgang, vi leia med to mål, 9-7, etter 16 minutt. 

 

Men i sluttminutta av omgangen gjekk det bokstaveleg tala stang ut, og Åsane fekk straffekast og sikra seg ei firemålsleiing då laga tok pause.

I andre omgang var det også jamnt lenge, men Åsane hadde heile tida det nødvendige forspranget. Men jentene våre fekk vist heimepublikummet at dei har teke eit godt steg framover sidan det såg litt håplaust ut før jul. Benedicte Frøyen Bergset sprang inn fleire flotte kontringsmål, og Emma Gloppestad bidrog med gode skot og innspel. Ho vart kåra til vår beste spelar.

Trenar Øyvind Indrebø sa seg nøgd med spelet,

- Vi spelar jamnt med dei store delar av kampen, men ser at dei i avgjerande situasjonar er eitt knepp opp. Vi må nok ha eit par poeng i dei to siste kampane for å greie plassen, men det meiner eg vi skal greie. Innsatsen i dag gir bra påfyll med sjølvtillit.

I Bergen vann Stavanger over BSI, og om dei slår Årstad søndag er dei a poeng med Førde, men går føre på grunn av at dei har vunne innbyrdes oppgjer mot Førde.

Måla til Førde: Emma Gloppestad 7, Benedicte Frøyen Bergset 7, Oda Vindheim 5 (3 på straffe), Kinga Lemiech 2, Tuva Tefre Kalstad 2, Vilje Sande-Neset 1. 

Andrea Boge Solås hadde ein ny god kamp i Førde-målet. Mot slutten overlet ho plassen til Vibeke Solheim (biletet under), som gjorde fleire fine redningar, m.a. på straffekast.