Toppar 4. divisjon etter bortesiger

BSI-Førde 27-34 (11-14): Lars Engen Skadal (biletet) og dei andre på herrelaget til Førde tok med seg to poeng heim frå turen til Bergen laurdag. Som vanleg tok det litt tid før våre karar kom skikkeleg i gang, så BSI var i føringa dei første åtte minutta. Då kom ein god Førde-periode, og etter det hadde vi kontroll på det meste, bortsett frå dommarane.

Ser ein på kampstatistikken skulle ein tru at det var ein stygg kamp, med 12 tominutts utvisingar og tre raude kort, to til BSI og eitt til Førde. Det var det Daniel Kvidahl som fekk tidleg i andre omgang.

Men ifylgje lagleiar Leif Otto Olsen var det slett ikkje nokon stygg kamp.

- Dommarane la seg på ei veldig streng linje, spelarane kunne knapt vere borti kvarandre. Eg synest det var ein fin kamp, med ei god tone mellom laga. BSI gav uttrykk for at det var kjekt å møte skikkeleg motstand.

No toppar Førde tabellen med fire poeng på to kampar.

Thomas Niiranen Hamre vart vår toppscorar med 10 mål, Lars Engen Skadal hadde 9, Jakub Rycerz 5, Daniel Kvidahl 4 (2 på straffe), Mathias Indrebø 2, Robin Gjesdal 2, Trond Gjesdal 1 og Matheus Diaz Boge 1.