God start på 4. divisjon

H4; Førde-Norrøna 29-19 (18-11): Herrelaget vårt starta 4. divisjon slik dei dreiv på i 5. divisjon i vår, det vil seie med klar siger. Men det såg ikkje slik ut i starten. Etter seks minutt stod det 1-5 på måltavla. Bergensarane såg ut som eit betre lag. Sakte, men sikkert kom det seg. Etter 14 minutt var vi a jour, og frå 12-11 stengde vi eige bur, slik at det stod 18-11 då dommarane bles til pause.

Andre omgang starta med fire mål til oss før Norrøna fann nettmaskane. På det meste var Førde oppe i 13-målsleiing. Det enda med ti mål i pluss. 

Lagleiar Leif Otto Olsen var bra nøgd med kampen. 

- Det var litt tungt i starten, vi brukar litt tid på å kome i gang i kampane, men siste delen av første omgang greidde ikkje Norrøna å henge med. 

Det høyrer med til historia at Norrøna slo Florø med fire mål i Florø laurdag.

Kristian Henden vart vår toppscorar med 8 mål. Daniel Kvidahl hadde 6 (1 på straffe), Lars Engen Skadal 5,Jakub Krzysztof Rycecz 4,  Matheus Diaz Boge 2, Ole Kristian Gjerstad 1, Mathias Indrebø 1, Kasper Eide 1, Thomas Hamre 1.

H5; Førde- Flaktveit 21-32 (11-17): Medan førstelaget tok to poeng i 4. divisjon, gjekk det ikkje like bra med andrelaget, som spelar i 5. divisjon. - Vi spelte ein OK førsteomgang, men med berre åtte spelarar vart det vanskeleg, seier lagleiar Leif Otto Olsen, som likevel er nøgd med laget sitt.