Ny kamp - ny sjanse til poeng

Kaptein Oda Vindheim og resten av 2. divisjonslaget til Førde IL Handball møter Randesund i Førdehuset laurdag klokka 16.00. Randesund spelte i 1. divisjon i fjor og ligg på tredjeplass på tabellen med 23 poeng. Vi ligg nest sist med fem poeng. Men vi tapte med berre fem mål i bortekampen på Sørlandet, så det var ikkje klasseskilnad på laga. Difor er det fullt mogeleg med to poeng laurdag dersom heimelaget har dagen og publikum møter opp og støttar oss. 

Trenar Øyvind Indrebø seier at han og laget gler seg til ein ny heimekamp.

- Vi er førebudde på at vi møter eit godt Randesund, som naturleg nok er favorittar. Men vi leverte ein god kamp mot dei borte, og har trua på at vi kan utfordre dei på heimebane. Det vil hjelpe oss å ha eit entusiastisk heimepublikum på tribuna.

På tribunen kjem det til å vere mange handballinteresserte jenter, for J11-lag frå heile Sogn og Fjordane er samla for å spele kampar i Førdehuset. Men det er sjølvsagt plass til alle som vil vere med på å heie fram jentene våre til to viktige poeng. Det trengst, for det er fire poeng opp til trygg plass. På den andre sida er det enno mange kampar att, mange av dei på heimebane, så det vil framleis vere håp i hengande snøre om det ikkje skulle bli siger.

Foto: Photoevent