Dei yngste får spele - damene må vente

Postet av Førde IL - Handball den 14. Jan 2022

Jenter 11 kan snart spele kam igjen, medan damene må vente.

 

Regjeringa har letta på koronarestriksjonane for idretten, og det gjer at dei  som spelar aldersbestemt handball kan kome i gang att med kampar. Men i seniorklassane er det berre 1. divisjon som har fått klarsignal. Det betyr at damelaga våre i 2. divisjon og 4. divisjon må vente på neste eventuelle endring i restriksjonane.

Dette er kjipt, seier sportsleg leiar i Førde IL Handball, Oddny Sønnesyn.

- Det pågår forhandlingar mellom NHF og helsestyresmaktene om at 2. divisjon kan kome i gang att, så førebels ventar eg og ser kva det fører til. Men det er kjipt og etter mi meining feil på noverande tidspunkt å ikkje la vaksne trene som normalt. Men må vi vente, så må vi det.

Når dei eventuelt får klarsignal, må det trenast i to veker før dei spelar kamp igjen.

Sportsleg leiar Oddny Sønnesyn og trenar Øyvind Fougli Vraalsen får ikkje sjå laget i kamp på ei stund.

 

Det uroar handballpresident Kåre Geir Lio at det berre er dei to øvste divisjonane på seniornivå som har grønt lys.

At ein stor del av laga på seniornivå framleis må vente på å trene som normalt og spele kampar, bekymrar oss. Denne gruppa har vore veldig skadelidande gjennom heile pandemien. Til sjuande og sist handlar dette om folkehelsa, både den fysiske og mentale. Det skuffar meg at politikarane ikkje prioriterer langsiktig tenking, sier Lio til Handball.no.

Alt i morgon kan Førde sine G14 og G16 spele seriekampar, begge borte mot Gloppen. Søndag 16.1. skal G10 spele mot Florø og Florø3 i Førdehuset og G16 borte mot Gloppen 2. 

Tekst og foto: Kjell Arvid Stølen.


0 Kommentar

Kjerstin er i gang att

Postet av Førde IL - Handball den 11. Jan 2022

Kjerstin Boge Solås er omsider klar for seriespel for Byåsen, etter ein marerittaktig serie av skadar. Jenta frå Dale, som nett fylte 24 år, har vore innpå i tre seriekampar til no. Det har resultert i to mål (og ein tominuttar), og det beskjedne talet på scoringar fortel mellom anna at ho blir matcha svært varsamt enno.

- Eg har eit maks tal minutt eg får lov å spele i løpet av kampen. Det er litt rart og framleis mykje nerver, men det kjennest bra ut. Eg får gode tilbakemeldingar frå trenaren, men det er alltid ting og detaljar å jobbe med.

- Blir det mest forsvarsspel på deg?

- Nei, eg spelar like mykje begge vegar, slik det er no.

Det har gått fem år sidan ho som tidenes yngste debutant på kvinnelandslaget var med på å ta gull i EM i Sverige. Då var ho enno ikkje fylt 19 år. Ho spelte jentehandball i handball i Dale, før ho fekk prøve seg på eit høgare nivå i Førde. Deretter gjekk turen til Bergen og Tertnes, før ho prøvde seg som utanlandsproff i Ungarn. Det var der skademarerittet starta, og Kjerstin vende nasen heimatt til Norge. 

Byåsen vart den neste klubben, men alt i oktober 2020 var det klart for ny skade og eit halvt år med opptrening. No, godt og vel eitt år seinare, håpar ho at knea held, slik at ho igjen kan spele ein sentral rolle i norsk handball.

Då Byåsen slo Follo 30-27 søndag var ho ei av dei trenaren sende på bana frå starten av andre omgang. Då snudde trønderane 11-13 til 16-16 på få minutt, og det enda med to poeng.

Tekst; Kjell Arvid Stølen. Foto: Lars Skaug.


0 Kommentar

Vi planlegg framtida

Postet av Førde IL - Handball den 11. Jan 2022

Styreleiar Geir Eikås leia møtet.

Måndag 10. januar var styret i Førde IL Handball, sportsleg utval og nokre av trenarane samla på Sunnfjord Hotell for å diskutere framtida. Trass usikre tider med pandemi og stans i kampaktiviteten må det leggast planar. Møtet var ein første start på ein prosess der vi skal stake ut kursen framover.
Det vart konstatert at vi har god rekruttering i dei aller yngste årsklassane, både blant gutar og jenter. Utfordringa er å minske fråfallet når spelarane blir eldre. Her handlar det om å gjere det så attraktivt og kjekt å drive med handball at fleire vel med å bli med heilt opp på seniornivå. Eitt verkemiddel er betre samarbeid med andre idrettsgreiner, slik at dei som driv i fleire greiner ikkje blir pressa til å velje bort den andre i for tidleg alder.
Det var semje om å gjere det vi kan for at damelaget skal halde seg i 2. divisjon. Det kom mange gode innspel på møtet. Planen skal no opp på styremøtet i februar.

 


0 Kommentar

Eit kapteinsteam av omsorgspersonar

Postet av Førde IL - Handball den 16. Des 2021

I tillegg til kaptein Oda Vindheim, har 2. divisjonslaget til Førde to visekapteinar: Målvakt Andrea Boge Solås (25) og kantspelar Veslemøy Risnes Kjønås (22). Begge studerer sjukepleie i Førde. Når vi veit at også Oda er sjukepleiestudent, så kan det seiast at Førde har eit kapteinteam  fylt med omsorgspersonar.

Veslemøy var ikkje med då Førde spelte  i 1. divisjon. Ho starta med handball som lita jente og var med oppover i aldersbestemte klassar i Førde, m.a. i Bring-serien og Lerøy-serien.

- Eg har ein eldre bror, Håvard, som spelte handball, og det låg litt i familien at det var kjekt. Så var eg eitt år i Bergen og spelte handball der, i NHHI, og så kom eg tilbake hit.

No er ho godt i gang med sjukepleiestudium, og har ein travel kvardag med trening, kampar, i tillegg til studiet. Likevel var det opplagt at ho ville vere med på å byggje opp eit nytt Førde-lag.

- Det var ein periode eg ikkje spelte handball, fordi det vart mykje , men eg oppdaga fort at eg sakna det, og eg er veldig glad for at eg vart med.

Kantspelaren har noterte seg for 22 mål i serien i år, ein del av dei på kontringar. Ho hugsar godt ein av kampane i Førdehuset i haust, der Førde leia med eitt mål kort tid før slutt.

Då kom ho åleine mot målvakta til Kjøkkelvik. Det enda med eit skot i stanga, og på tampen scora Kjøkkelvik to mål og vann 30-29.

- Eg fekk litt skuldkjensle, men så må vi tenke på at det var ikkje berre meg og det eine målet som gjorde at vi tapte, sjølv om det er lett å tenke at vi hadde vunne om eg hadde scora.

 

Trass i alle tapa i haust har Veslemøy hatt det veldig moro på handballbana.

-Eg har aldri tidlegare følt meg så sett, eg har fått mykje speletid, og eg synest det har vore veldig kjekt. Det er travelt med både handball og studium, men eg  trivst veldig godt med det.

Andrea Boge Solås spelte då Førde var i 1. divisjon, og såg at dei aller fleste av medspelarane forsvann etter nedrykket og i koronapausen frå mars 2020 til treningane kom i gang att i juni 2021. Likevel var ho klar då eit nytt lag skulle byggast.

- Ja, det var opplagt at eg ville vere med. Det var sjølvsagt kjipt å rykke ned, men eg var ikke klar for å gi meg med handball, så eg hadde veldig lyst til å vere med vidare.

Andrea kjem frå Dale og lærde å bli glad i handball der, men var glad for å få prøve seg på høgt nivå i 1. divisjon med Førde. Ho syntest det sleit på motivasjonen då koronaen gjorde at det var mykje av og på med trening, med trening utan kontakt. Men den lange pausen heilt utan handball fekk fram att motivasjonen.

- Så eg gledde meg veldig til å kome i gang att. Det er sjølvsagt kjipt at vi har tapt så mange kampar, men vi må ta med oss at mange av kampane var jamnspelte, og vi kunne godt ha teke poeng i ein del av dei. Så det er ikkje heilsvart. Eg har tru på at vi skal greie oss til slutt.

Koronarestriksjonane   gjer at den komande kampen som skulle ha gått i Bergen 18. desember mot Gneist, er utsett. Då er neste kamp mot Viking i Førdehuset 15. januar, og dette blir ein veldig viktig kamp, seier Andrea.

- Det er det einaste laget vi har teke to poeng mot,  så det kan bli heilt avgjerande å vinne også heimekampen.

Tekst og foto: Kjell Arvid Stølen.


0 Kommentar

Koronaen stansar oss - igjen

Postet av Førde IL - Handball den 14. Des 2021

Restriksjonane som regjeringa har innført for å få ned koronasmitten får fylgjer for handballen. Sett bort frå   Rema 1000-ligaen for menn og kvinner blir det stans i all kampaktivitet frå 15. desember til 11. januar. For 2. divisjonslaget vårt betyr det at ein kamp blir utsett, bortekampen mot Gneist, som skulle ha gått komande laurdag. Den neste kampen er heime mot Viking den 15. januar, så dersom forbodet mot kampar ikkje blir ført vidare, kan den gå som planlagt.

Når det gjeld trening, skriv Handballforbundet dette på si heimeside: Også treningsaktiviteten påvirkes. Norges Håndballforbund er i dialog med de rette instanser for å innhente avklaringer om hva de nye endringene innebærer for Håndball-Norge, og vil kommunisere dette når vi har fått bekreftet informasjon. 


0 Kommentar

Levert av IdrettenOnline